Македонскиот тенисер Калин Ивановски е поразен во финалниот меч на фјучрс турнирот ИТФ М15 Опатија откако денеска загуби од првиот носител Хрватот Лука Микрут со 2-0 во сетови (63 76(4)) за еден час и 56 минути игра. Поразот значи и крај на серијата од седум победи на Ивановски, откако на турнирот имаше три меча (три победи) во квалификациите и уште пет меча на главниот турнир (четири победи). На патот до финалето македонскиот тенисер оствари и три победи над носителите меѓу кои и победникот на претходниот турнир од Истарска ривијера (Вјачеслав Биелински).

Во првиот сет од финалето Микрут направи брејк во 4.гем за водство од 3:1 во гемови и предноста ја зачува до крајот на сетот, кој го доби со 6:3 во гемови. Вториот сет имаше неколку промени во резултатот. Ивановски поведе со 3:0 во гемови со брејк, но потоа следуваше прекин поради дожд (беше присутен за време на целиот турнир). По 4:1 за македонскиот тенисер првиот носител направи брејк и успеа да изедначи на 4:4 во гемови. Но, неизвесноста продолжи до тај брејкот, откако Микрут во 11.гем направи уште еден брејк за водство од 6:5 во гемови. Сепак Ивановски успеа да возврати со ри-брејк за 6:6 во гемови, а притоа спаси и меч топка на сервис на противникот. Во 13.гем (тај брејкот) имаше само еден брејк поен за Микрут кога поведе со 3:2 на поени и гемот го заврши со 7:4 на поени што беше пралтично и 2-0 во сетови.

За Ивановски ова беше деветто финале, а има пет турнириски победи (Монастир, Ираклион, Мадрид – 2022 година, Скопје и Крамсах – 2024 година). Инаку, Ивановски во 2024 година поради повреда пропушти најголем дел од сезоната.

ИТФ фјучрсот во Опатија беше дел од 53.то издание на „Истарска ривијера“.

Денешното полуфинале Ивановски го стартуваше одлично и во третиот гем од првиот сет направи брејк за водство од 2:1 во гемови, кое успеа да гоз ачува до крајот на сетот за 6:4 во гемови и водство од 1-0 во сетови. Во вториот сет искусниот ривал на речиси идентичен начин стигна до предност го освои вториот гем во сетот за 2:0 во гемови и предноста од брејк ја зачува за конечни 6:3 во гемови во вториот сет и 1-1 во сетови.

Во решавачкиот сет имаше многу повеќе борба пред се во почетните гемови. Ивановски во првиот успеа да спаси две брејк топки и поведе со 1:0 во гемови. Потоа Чехот Врбенски спаси две брејк топки и стигна до 1:1 во гемови. И во следниот гем на сервис Ивановски спаси брејк топка и стигна до предност од 2:1 во гемвои. Клучен беше шестиот гем на сервис на чешкиот тенисер кога Калин направи брејк за предност од 4:2 во гемови, а потоа на свој сервис стигна до 5:2 и сетот го заврши со 6:3 во гемови.

Во мечот Ивановски имаше скор од 2/4 во брејкови, а Врбенски 1/5, додека во бројот на поени скорот беше 93:89 за Ивановски.

Противникот во финалето Микрут во денешниот полуфинален меч го победи Шпанецот Серхи Перез Контри со 2-0 во сетови (62 61).

Ова за Ивановски е деветто финале во кариерата, а има пет турнирски победи последната во 2023 година во австрискиот Крамсах, но поради повреда ја пропушти целата сезона во 2024 година.

Македонскиот тенисер Калин Ивановски ја продолжи серијата победи (вкупно шест со квалификациите) и се избори за полуфинале на ИТФ фјучрсот во Опатија што се игра за награден фонд од 15.000 долари. Тој денеска во четвртфиналето (по вчерашниот исцрпувачки меч во три часа) го совлада вториот носител Зденек Колар од Чешка со 2-0 во сетови (63 76(4)) за два часа и четири минути игра. Утре во полуфиналето ќе игра против уште еден тенисер од Чешка третиот носител Михаел Врбенски (25 години, 406 место АТП листа).

Во четвртфиналето Ивановски почна со брејк и водство, но противникот во шестиот гем направи брејк и изедначи на 3:3 во гемови. Но, следните три гема ги доби Калин (со два брејка) и сетот го заврши со 6:3 во гемови. Во вториот сет на стартот имаше три брејка (два за Колар и еден за Ивановски), а мечот беше и прекинат околу 1,5 час поради дожд. Предноста на ривалот Ивановски ја анулираше во осмиот гем кога ја искористи четвртата брејк топка и изедначи на 4:4 во гемови. Во продолжение немаше брејкови и сетот беше решен во тај-брејкот. По водството на Колар од 4-2 на поени, македонскиот тенисер направи серија од пет поени и го доби тај-брејкот со 7-4, со тоа и сетот со 7:6 во гемови, а мечот со 2:0 во сетови.

Ивановски искористи 5 од 8-те брејк шанси, додека Колар имаше 3 од 6. Во вкупниот број поени скорот беше 80:67 за Ивановски.

Утрешниот ривал Врбенски во четвртфиналето го совлада јуниорот Огљен Милиќ од Србија со 2-0 во сетови (63 61).

Почетокот на полуфиналето е закажано за утре (сабота) во 10 часот.

Македонскиот тенисер Калин Ивановски во изедначен и маратонски меч успеа да го совлада шестиот носител Вјачеслав Биелински од Украина во второто коло на ИТФ фјучрсот во Опатија што се игра за награден фонд од 15.000 долари. Ивановски победи со 2-1 во сетови (76(3) 57 76(4)) за 3 часа и пет минути игра.

Во првиот сет се водеше голема борба за секој поен, а тенисерите го освојуваа гемот на сопствен сервис. Во 13-тиот гем во тај брејкот под 1:0 на поени за Биелински, Ивановски направи серија од четири поени за предност од 4:1 и гемот го заврши со 7:3 на поени за водство од 1-0 во сетови. Во вториот сет изедначео беше до 5:5 во гемови кога противникот на Калин успеа да направи брејк и сетот потоа го доби со 7:5 во гемови за 1-1 во сетови.

Во решавачкиот сет повторно неизвесност до 3:3 во гемови. Но, по направениот брејк украинскиот тенисер дојде до предност од 5:3 во гемови. Ивановски најави пресврт го доби деветиот гем во сетот за да намали на 5:4 во гемови. Во 10-тиот гем Биелински беше на две топки до победа на свој сервис, но македонскиот тенисер не го дозволи тоа и успеа од единствената брејк шанса да напарви брејк и да изедначи на 5:5 во гемови. По 6:6 во гемови следуваше уште еден тај брејк. Калин повторно почна одлично и поведе со 4:0 на поени и предноста ја зачува до крајот добивајќи го сетот со 7:4 на поени.

Ова е петта победа за Ивановски на овој турнир (три во квалификациите) и утре во четвртфиналето Калин ќе игра против вториот носител на турнирот Зденек Колар од Чешка (28 години, 399 место АТП).

 

УНИБанка АД Скопје станува Генерален спонзор на Тениската Федерација на С.Македонија 

Тениската федерација на С.Македонија со задоволство најавува дека УНИБанка АД Скопје станува Генерален спонзор на федерацијата.

Ова партнерство претставува важен чекор во развојот на тенисот во нашата држава и ќе обезбеди дополнителна поддршка за остварување на значајни проекти од Програмата за работа на федерацијата. Поддршката од страна на Банката вклучува настани, турнири, обуки и тениски фестивали кои ќе создадат платформи за развој и натпреварување на спортисти од сите возрасти. Со овие активности се очекува значителен напредок во организацијата на домашни и меѓународни турнири, како и продолжување на соработката со светски познати тренери и тенисери, што ќе обезбеди нови можности за промоција на талентираните младинци и за остварување на нивните амбиции во светот на тенисот.

„УНИБанка дава значаен придонес во спортот во Македонија и имаме огромна чест што овој пат се вклучува и со поддршка на Тениската федерација. Се надеваме дека заеднички ќе постигнеме нови успеси, ќе реализираме настани кои ќе се паметат и ќе бидат мотивација и инспирација за идните генерации тенисери“, изјавија од Тениската федерација на С.Македонија.

„УНИБанка станува горд партнер на Тениската федерација на С.Македонија и со задоволство ја воспоставуваме оваа соработка. Поддршката на спортот и младите таленти е составен дел од нашата корпоративна одговорност и веруваме дека ова партнерство ќе придонесе за позитивна промена во тениската заедница“, изјавија од Управниот одбор на УНИБанка АД Скопје.

УНИБанка е препознаена по својата општествена одговорност и поддршка во спортот, а најмногу и како организатор на традиционалниот тениски турнир UNIBANK Invitational, кој годинава ќе се оддржи петта година по ред. Оваа иницијатива на Банката сега е проширена со партнерство и генерално спонзорство на Тениската федерација на С.Македонија.

Македонскиот тенисер Калин Ивановски ја продолжи серијата победи на ИТФ фјучрс турнриот М15 Опатија. Тој денеска оствари победа во мечот од првото коло против Кејн Бонсах Генлеј од Данска со 2-0 во сетови (64 75) за 103 минути игра. Ивановски имаше максимален учинок на брејк топки односно од двете прилики – двете ги искористи, додека успеа да спаси шест брејк шанси на противникот. Во вкупниот број поени во изедначениот меч скорот беше 74:64 за Ивановски.

Во првиот сет првите возбудувања беа во третиот гем кога ривалот на Ивановски ја имаше првата брејк топка, која нашиот тенисер ја спаси. Двајцата играчи нема проблеми со освојување на гемот на свој сервис се до 10.тиот гем кога Ивановски ја искористи првата брејк топка и го доби сетот со 6:4 во гемови за водство од 1-0 во сетови. Слична беше сликата и во вториот сет, повторно во третиот гем данскиот тенисер имаше дури пет брејк топки, кои Калин успеа да ги спаси. Во овој сет во 12.гем Ивановски направи брејк искористувајки ја брејк топката број 2 која беше воедно сет-меч топка за македонскиот тенисер. Вториот сет заврши со резултат 7:5 во гемови.

Во второто коло Ивановски за противник го има шестиот носител Вјачеслав Биелински од Украина (21 година, 540 место АТП листа), кој го освои турнирот во Ровињ што се играше претходната недела. Биелински во првата рунда го совлада Нејтан Блохин од САД со 2-0 во сетови (63 60).

Македонскиот тенисер Калин Ивановски успеаја да се пласира на главниот турнир на ИТФ М15 Опатија што се игра за награден фонд од 15.000 долари. Тој по трите победи во квалификациите ќе ги продолжи мечевите.

Најголе проблем за Ивановски, како и за организаторот и за другите тенисери беше дождот, поради кој предвидената програма имаше многу измени, па така македонскиот тенисер денеска имаше два меча. За пласман на главниот турнир во финалето од квалификациите го совлада Грегор Рамскоглер (трет носител) од Австрија со 2-0 во сетови (63 64), а во првиот денешен меч во втората рунда од квалификациите го надигра Ахилес Белкович од Унгарија со 2-0 во сетови (61 63). Најтешкиот противник македонскиот тенисер го имаше во првата рунда квалификации кога по голема борба го совлада Макс Батуенко од Украина со 2-1 (76(1) 36 и 10-8 на поени во решавачкиот сет).

Ивановски го очекува противникот во првото коло, а мечот ќе се игра утре. Македонскиот тенисер претходната недела имаше настап на Челинџер трурнирот во Задар.

Горазд Србљак пак настапи во квалификациите на фјучрсот во Аламинос што се игра за награден фонд од 15.000 долари. Србљак денеска во финалето од квалификациите загуби од Никола Парициа од Швајцарија со 2-0 во сетови (63 62), додека во првата рунда го совлада Маркос Јаковидес од Кипар со 2-0 во сетови (63 62).

Најдобрата македонска тенисерка Лина Ѓорческа имаше успешен настап на W75 турнирот во Марибор, каде избори пласман во полуфиналето. Таа за пласманот меѓу четирите успеа да освои и 29 поени што во секој случај ќе и помогнат при новото рангирање на ВТА листата за следната недела.

На турнирот во Марибор македонската тенисерка оствари три победи. Во првото коло ја совлада Петра Марчинко од Хрватска со 2-0 во сетови (64 64), а во втората рунда беше поуспешна во Французинката Жесика Понше со 2-1 во сетови (64 26 76(9)) во маратонски меч и воедно и се реваншираше за поразот на почетокот на сезоната на турнир во Франција. Во четвртфиналето Ѓорческа ја совлада Мариам Болквадзе од Грузија со 2-0 во сетови (76(5) и 63), откако ден претходно двете го предадоа мечот во игра на двојки (Ѓорческа и Болквадзе заедно настапуваа во двојки). Во полуфиналето македонската тенисерка беше поразена од Антонија Ружиќ од Хрватска со 2-0 во сетови (63 62).

Ова воедно преставува најдобро одигран турнир за Ѓорческа оваа календарска година.

По успешниот настап и полуфиналето на ИТФ фјучрсот во Марибор претходната недела, најдобрата македонска тенисерка Лина Ѓорческа оваа недела беше пријавена за настап на уште еден турнир од истиот ранг W75 со награден фонд од 60.000 долари. Сепак во денешниот меч од првото коло седмата носителка Мано Леонар од Франција оствари победа од 2-1 во сетови (67(4) 75 62) за два часа и 49 минути игра.

Почетокот на мечот и припадна на ривалката која поведе со 3:0 во гемови во првиот сет, но македонската тенисерка успеа да стигне до изедначување од 3:3. Во 10.тиот гем Ѓорческа успеа да спаси и сет топка, а потоа во тај брејкот по 3:3 на поени со серија од 4-1 стигна до водство од 1-0 во сетови. На стартот од вториот сет имаше по два брејка за секоја од тенисерките, а по 3:3 во гемови повторно имаше пет брејка и Французинката Леонар поведе со 6:5, а потоа го доби гемот на свој сервис за 1-1 во сетови. Во решавачкиот сет по 2:2 во гемови по 12 одиграни поени го загуби гемот на свој сервис и противничката поведе со 3:2 во гемови, а до крајот имаше серија од три гема за 6:2 во тертиот сет и 2-1 во сетови.

Со полуфиналето на претходниот турнир во Марибор, Лина Ѓорческа освои 29 поени, а следната недела ја очекува настап на турнир во Франција во градот Нант.

Настап оваа недела на ИТФ фјучрс W15 во египетскиот град Шарм Ел Шеик имаше и Магдалена Стоилковска. Таа не успеа да се пласира во главниот турнир откако денеска во финалето од квалификациите загуби од Марија Шмакова од Русија со 2-0 во сетови (63 61). Во првиот меч од квалификациите постигна победа од 2-0 (62 62) против Милана Цулигина од Русија.

Двете тенисерки заедно со Ана Митевска и Јана Божиновска се пријавени за настап за македонскиот национален тим во Били Џин Кинг купот. Македонија се натпреварува во Втората Евро-африканска зона. Мечевите оваа година ќе се играат во Ларнака, Кипар.

Длабоко сме потресени од трагичната несреќа во Кочани во која настрадаа многу млади луѓе. 

Во овие тешки моменти, нашите мисли и молитви се со семејствата и блиските на настраданите. 

Изразуваме најискрено сочувство и поддршка. 

Тениската федерација на Македонија ги одложува сите настани кои беа планирани денес и во наредните денови. Во наредниот период ќе следат дополнителни информации.