Македонската Дејвис куп репрезентација го изедначи резултатот на 1:1 во мечот со Малта од 1.коло од Третата Европска зона што се игра во Ларнака, Кипар. Првиот поен за нашиот тим го донесе најдобриот тенисер на Македонија Калин Ивановски кој со 2-0 (62 64) за 1 час и 18 минути го совлада Лиам Деликата. За победникот во мечот ќе решава пресметката на дубловите на двете репрезентации.
Во првиот сет и во мечот нашиот тенисер стартуваше одлично и по двата брејка поведе со 4:0, а потоа двајцата тенисери освојуваа гем на свој сервис и сетот заврши со резултат 6:2 за Ивановски. И во вториот сет на самиот почеток Ивановски направи брејк за водство од 2:0 и таа предност ја имаше до крајот на сетот. Во 10.гем на свој сервис не ја искористи првата меч топка, а притоа направи и двојна грешка, за веднаш потоа да ги земе следните два поена и да го освои сетот со 6:4.
Инаку во првиот меч Обрад Марковски загуби со 2-1 во сетови од Алекс Габриеле.
Во мечот на двојки за Македонија ќе играат Берк Бугариќ и Калин Ивановски, а за Малта Алекс Дегабриеле и Лиан Деликата.