Во периодот од понеделник до четврток ќе се одигруваат мечевите од Државното екипно првенство на Македонија во тенис. Оваа година седум екипи ќе настапат во следните четири дена, а поделени се во две групи (една со три екипи, а втората со четири). Победниците на групите во четврток ќе играат во финалето, а второпласираните ќе е борат за третата позиција.
Според распоредот во групата 1 се екипите: Југ од Скопје, Неготино од Неготино и Тумба од Куманово, а во групата 2 се Поинтер од Скопје, МТП од Скопје, Битола од Скопје и Мондано од Скопје.
Во првото коло во понеделник ќе играат: Југ – Тумба, Поинтер – Мондано и МТП – Битола, а слободна е екипата на Неготино. Почетокот на мечевите е во 9 часот, а ќе се играат на терените на ТК Југ.
Како дел од екипите се актуелни и поранешни македонски репрезентативци, како и младите тенисери, кои ќе бараат шанса за добар резултат.
Титулата од минатата година ја бранат тенисерите на Југ.